Өскемен, Риддер, Алтай, Серебрянка қалаларындағы емхана, мектеп, аулалар мен спорттық алаңдар және сумен қамту жүйесі жөнделеді, деп хабарлайды Алтайньюс тілшісі.

Өскемендегі бір мектеп және Ана мен бала орталығының екеуі де жөнделеді. Сондай-ақ жолдар мен аулалар да абаттандырылады.

Риддерде де жол мен аулалар көркейтіліп, емханаларға жабдықтар алынады. Сондай-ақ сумен қамту жүйесі де жөнделеді.

Алтайда су құбырлары қалпына келтіріліп, перзентхана мен облыстық емхана жабдықталады.

Ал Серебрянкада жол салынып, қазандық қалпына келтіріледі.

Осы аталған істің барлығына «Қазцинк» кәсіпорыны қаражат бөледі. Кәсіпорын мен облыс әкімдігі арасында әлеуметтік серіктестік туралы меморандумға келісім бар екені белгілі.

– Біз өз кәсіпорынымыздың бөлімдері орналасқан қалаларды әлеуметтік серіктестік аясында көркейтуге ат салысамыз. Ірі бизнес жүргізіп жатқан соң, жергілікті халыққа да көмектесуіміз керек, – деді кәсіпорынның әкімшілік мәселелер жөніндегі атқарушы директоры Андрей Лазарев.