Бүгін Өскемен қаласындағы “Желтоқсан алауы” монументі маңында ерекше рухани шара өтті. Желтоқсан көтерілісі құрбандарын еске алу мақсатында желтоқсаншылар мен қала тұрғындары бас қосып, азаттық жолында құрбан болған азаматтарды бір минут үнсіздікпен еске алды.

Шара барысында қатысушылар ескерткішке гүл шоқтарын қойып, құрмет көрсетті. “Бұл қасіретті күнді еске алу – халқымыздың тәуелсіздікке жету жолындағы маңызды тарихи белестерін дәріптеудің бір көрінісі” деп атап өтті шараға арнайы келген “ШҚО Желтоқсан 86” қоғамдық бірлестігінің төрағасы Маратбек Рамазанов. 

Шара соңында қатысушылар Желтоқсан оқиғасының еліміздің тәуелсіздігі тарихындағы орны мен маңызын болашақ ұрпаққа жеткізу қажеттігін тағы бір мәрте атап өтті. Бұл еске алу рәсімі халқымыздың тарихына құрмет көрсетіп, ел бірлігін нығайтуға арналған рухани шаралардың маңызды бір бөлігіне айналды.

Қуаныш Рахметоллаұлы