Ертең Өскемен қаласында өтетін Kazakhstan Fashion Week Oskemen сән апталығы – өңір үшін ғана емес, күллі еліміздің сән индустриясы үшін маңызды оқиға. Бұған дейін тек Алматы мен Астана төрінде өткен сән апталығы енді Шығысқа келіп, талантты дизайнерлерге жаңа мүмкіндік, жаңа сахна ұсынып отыр. Қазақстандық, грузиялық, тәжікстандық, ресейлік белгілі дизайнерлер мен байерлер баспасөз мәслихатында ертең көрсетілетін топтамалары және алдағы жоспарларымен бөлісті, деп хабарлайды Altainews.kz тілшісі.

Ұйымдастырушылар Kazakhstan Fashion Week Oskemen сән апталығы жай ғана сән көрсетілімі емес, бұл – отандық fashion индустрияны дамытатын институт екенін атап өтті.

Қазақстандық, грузиялық, тәжікстандық, ресейлік танымал дизайнерлер мен байерлер бас қосқан бұл апталық өңірдегі сән әлемінің жаңа дәуірін бастап отыр. Шығысқа Kazakhstan Fashion Week жобасының негізін қалаушы Алексей Чжен, Georgia Fashion Week авторы Тинатин Магалашвили, Tajikistan Fashion Week өкілі Тохир Ибрагимов және басқа да атақты дизайнерлер келді.

Қонақтарды Өскемен қаласы әкімінің орынбасары Ирина Смит құттықтап, алдағы сән көрсетіліміне сәттілік тіледі.
Kazakhstan Fashion Week Oskemen жобасының жетекшісі Лилия Каирова айтулы шараның өтуіне атсалысқан барлық қолдаушыларға алғысын білдірді.

Дизайнерлер – мәдениетті алға сүйрейтін жандар. Олар – жұлдыздарды киіндірушілер, стиль мен уақытты бейнелейтін өнер иелері.

Айта кетерлігі, сән апталығы еліміз үшін бұрыннан таныс формат болса да, Өскемен үшін бұл – тың қадам, үлкен мүмкіндік. Әсіресе соңғы жылдары Шығыс Қазақстан облысы туризм мен креативті индустрияны дамытуға ерекше назар аударып, осы бағытта түрлі бастамаларды қолдап келеді. Солардың бірі – дәл осындай халықаралық сән апталығы. Бұл жоба киім дизайны, сән өнері, зергерлік және қолданбалы өнермен айналысатын жергілікті шеберлер мен кәсіпкерлер үшін таптырмас алаң болып отыр. Өнімін кең аудиторияға ұсынғысы келетін, ұлттық нақышты заманауи үрдістермен ұштастыра алатын авторлар үшін бұл – өзін танытудың, дамудың және өрлеудің сәті.
Жергілікті дизайнерлер де назардан тыс қалған жоқ. Солардың бірі – сән апталығына қатысуға жолдама алған шығысқазақстандық дизайнер, SHOLPAN ATELIER брендінің авторы Бота Якупова.

Ресейлік Artmasterr бренді этно-кэжуал стилінде жұмыс істейді.

NEW GENERATION – OPEN WAY-2024 халықаралық байқауының жеңімпазы, алматылық дизайнер Аяжан Нұрбек – Жүргенов академиясының студенті. Соған қарамастан, сән әлемінде өз орнын алып үлгерген жас дизайнер ертең өз топтамасын жұртшылық назарына ұсынбақ.

Бұл апталық – жыл сайынғы дәстүрге айналатын, жаңа есімдер мен тың жетістіктерге жол ашатын ауқымды жоба. Ұйымдастырушылардың айтуынша, Өскемен енді Қазақстандағы басты сән алаңдарының біріне айналмақ.

Фото/видео: Жәнібек Ырысбай