Сыртқы істер министрлігі Нұрсұлтан Назарбаев пен Беларусь президенті Александр Лукашенконың телефон арқылы сөйлесуіне қатысты пікір білдірді.

"Демалыс күндері Беларусь президентінің баспасөз қызметі Александр Лукашенко мен Нұрсұлтан Назарбаевтың телефон арқылы сөйлескені туралы баспасөз хабарламасын жариялады, деп хабарлайды Altaynews.kz сайты.

Хабарламада олар халықаралық жағдайды, аймақтағы жағдайды және Беларусь-Қазақстан қарым-қатынасын талқылағаны атап өтілді.

Бұған қалай пікір айта аласыз?" – деп сұрады журналистер Сыртқы істер министрлігінің ресми өкілі Айбек Смадияровтан.

"Беларусь Президенті – Тұңғыш Президенттің ежелден серіктесі. Бұл ретте, өздеріңізге белгілі, сыртқы саясатты, оның ішінде шет мемлекеттермен қарым-қатынасты анықтау Қазақстан Президенті Қасым-Жомарт Тоқаевтың құзыреті болып табылады. Сондықтан, Қазақстан-Беларусь қарым-қатынасы тек қазіргі президенттер арасында талқылануы мүмкін", – деп жауап берді СІМ өкілі.