Прокуратура органдары АЭС салу мәселесі бойынша республикалық референдум өткізудің заңдылығын жоғары қадағалауды қамтамасыз етеді, ал ішкі істер органдарының жеке құрамы қызмет өткерудің күшейтілген нұсқасына ауыстырылды, деп хабарлайды Altainews.kz тілшісі.

ҚР БП Қоғамдық мүдделерді қорғау қызметі басқармасының бастығы Бекжан Қараманов референдум күні, яғни бүгін үгіт-насихатқа тыйым салынғанын еске салды. Сондай-ақ, сауалнама нәтижелерін масс-медиа мен онлайн-платформаларда жариялауға жол берілмейді.

Бекжан Карамановтың айтуынша, референдум туралы барлық өтініштерді соттар мен прокуратура органдары бүгін дереу қарайды.

Ел бойынша қоғамдық тәртіпті сақтауға 33 мыңға жуық полиция қызметкері мен Ұлттық ұланның әскери қызметшілері жұмылдырылды. Оның ішінде, 18 мың полиция қызметкері 10 мыңнан астам референдум учаскесінде қызмет атқаруда. ОКҚ алаңында өткен брифинг барысында ҚР ІІМ ресми өкілі Шыңғыс Алекешев осындай деректерді келтірді. Оның айтуынша, басшы және командалық құрамның тәулік бойғы кезекшілігі ұйымдастырылды.

ІІМ ресми өкілі сондай-ақ, полиция қызметкерлерінің референдум өткізу процесіне араласуға, сондай-ақ, дауыс беруге арналған үй-жайларда болуға құқығы жоқ екенін атап өтті. Олар дауыс беру залына Комиссия төрағасының шақыруымен ғана келеді.

Азаматтар сайлау және республикалық референдум туралы заңның бұзылуы туралы өтініш түсірген жағдайда ішкі істер органдарының кезекші бөліміне ақпарат жіберіп, прокуратура органдарын хабардар етеді.