Қазақстандық оқушылар Сингапурда өткен, робототехника саласындағы ең ірі FIRST Global Challenge чемпионатында рекордтық нәтижеге қол жеткізді.

Осы жеңісі арқылы ұлттық құрама өткен жылы Женевада алған чемпиондық атағын тағы бір мәрте растады, деп хабарлайды Altaynews Kazinform агенттігіне сілтеме жасап.

Қазақстан құрама командасында Алматы қаласындағы ФМБ НЗМ студенттері Нұрислам Тұрғынбай, Нұрсұлтан Жанзақов, Сергей Гапонов, Дәмелі Шаймерденова және Иманәлі Көксал болды. Ұлттық құраманың бапкерлері – Бекзат Іңкәров пен Нұрдәулет Досмағамбет.

FIRST Global Challenge – жыл сайын әртүрлі елдерде өтетін олимпиадалық үлгідегі жаһандық робототехника чемпионаты. Осы жылғы чемпионатқа әлемнің түкпір-түкпірінен 190-нан астам ел қатысты.

Еске салайық, Ұлттық құрама робототехника олимпиадасының іріктеу кезеңдерінде жасақталып, оған ҚР Оқу-ағарту министрлігі қолдауы көрсеткен.