Бүгін еліміз Отбасы күнін атап өтіп жатыр. «Отан отбасынан басталады» дейтін тәмсілге берік әрбір қазақстандық үшін бұл мерекенің алар орны ерекше.

«Отбасы – шағын мемлекет» десек, сол мемлекеттің мызғымас тірегі, мықты іргетасы еліміздегі әрбір отбасы екенін Президентіміз Қасым-Жомарт Тоқаев ұдайы айтып келеді. Отбасы құндылықтарын нығайту және бағзыдан жалғасқан баба дәстүрді насихаттаудың маңызына ерекше назар аударуы да сондықтан, деп хабарлайды Altaynews.kz сайты.

Айта кетейік, елімізде қыркүйек айының екінші жексенбісі Мемлекет басшысының Жарлығымен Отбасы күні ретінде белгіленген. Осы айтулы мерекемен аймақ тұрғындарын Шығыс Қазақстан облысының әкімі Ермек Көшербаев құттықтады.

Аймақ басшысы отбасы – бұл бақытты өмірдің негізі екеніне назар аудартады. Еліміздің өсіп-өркендеуі әр шаңырақтағы тұрақтылықпен тікелей байланысты. Сондықтан мемлекетіміз отбасы институтын нығайтуға барынша жағдай жасап отыр.