Конституциялық комиссияның екінші отырысында ҚР Әділет министрі Ерлан Сәрсембаев Негізгі заңға енгізілуі ұсынылып отырған маңызды түзетулерді таныстырды. Министрдің айтуынша, бастамалар азаматтардан, саяси партиялардан, қоғамдық ұйымдар мен сарапшылардан түскен ұсыныстарды ескере отырып әзірленген, деп хабарлайды Altainews.kz.

Ұсынылған өзгерістер Үкіметтің, Конституциялық соттың, прокуратура мен сот билігі органдарының жекелеген функцияларын нақтылауға, құқық қорғау тетіктерін жетілдіруге, жергілікті өзін-өзі басқару жүйесін дамытуға және жекелеген аумақтарда арнайы құқықтық режим белгілеу қағидаттарын айқындауға бағытталған. Сонымен қатар, Конституцияға өзгерістер мен толықтырулар енгізу тәртібін реттейтін нормаларды қайта қарау көзделіп отыр.

Түзетулердің жеке бір блогы болашақ бір палаталы Парламент – Құрылтайдың қызметіне қатысты. Атап айтқанда, төрағаны тағайындау, депутаттық корпусты қалыптастыру тәртібі және өзге де рәсімдік мәселелерді нақтылау ұсынылады.

Ерлан Сәрсембаев Конституцияға өзгерістер енгізу тәртібінің маңыздылығын ескере отырып, бұл нормаларды жеке бөлімге шоғырландыру қажеттігін атап өтті.

Үкімет функцияларын қайта регламенттеу аясында мемлекеттік бағдарламаларды бекіту өкілеттігін алып тастау, сондай-ақ мемлекеттік комитеттердің қызметін басқару, олардың актілерінің күшін жою және тоқтата тұру құзыреттерін қысқарту ұсынылады.

Сонымен қатар, ол 2021 жылдан бастап Қазақстанда мамандандырылған әкімшілік соттардың енгізілуі құқық үстемдігін нығайту жолындағы маңызды қадам болғанын еске салды.

Жалпы алғанда, Ерлан Сәрсембаевтың айтуынша, ұсынылып отырған өзгерістер мемлекеттік жүйенің тиімділігін күшейтіп, оның сапасын тек жеке тұлғалармен емес, жария билік институттарының орнықтылығымен бағалауға мүмкіндік береді.

Фото: Конституциялық сот