Мемлекет басшысы ​ Қасым-Жомарт Тоқаевтың Жарлығына сәйкес​ ​ 3477 әскери бөлімінің​ атқышы, ефрейтер Тілек Құмарбеков​ «Ерлігі үшін» медаліне ие болды.​

Ішкі істер министрі​ Ержан Сәденов Ұлттық ұлан қызметкеріне​ мемлекеттік награданы Республика күніне орай ұйымдастырылған салтанатты шарада өз қолымен табыстады, деп хабарлайды Altaynews тілшісі.

Еске сала кетсек, әскери қызметші​ Үлбі өзеніне шомылып жүрген​ 6 жасар баланы құтқарып, ажал аузынан алып қалды. Оқиға​ былтыр​ 16 шілдеде​ Тарханка ауылының маңындағы​ Үлбі өзенінде ​болған. Су иірімі ағызып әкетіп бара жатқан баланы көрген​ әскери қызметші​ дереу құтқаруға​ ұмтылады.​ Ағынды суға батып бара жатқан бүлдіршінді жағаға аман-есен алып шыққан ефрейтер есінен танып қалған. Медициналық көмекке мұқтаж болған​ жауынгер​ тек ауруханада​ ес жиған.