Қыран болмысты қазақтың сайын даласында “Шығыс салбурыны” фестивалі басталды
Республиканың шығыс өңірінде “Шығыс салбурыны - 2024” фестивалінің салтанатты ашылу рәсімі өтті. Оған республикалық “Құсбегілер” федерациясының вице-президенті Бағдат Мүптекеқызы, облыстық спорт басқармасының басшысы Асқар Можанов, шетелдік саятшылар, фестиваль қонақтары қатысты, деп хабарлайды Altainews.kz.
Бастапқы сөзді алған Бағдат Мүптекеқызы қатысушыларға сәттілік тіледі.
“Осындай ақсүйек өнерді дәріптеп, ұлттық құндылықтарды жаңғыртуға атсалысып отырған Шығыс Қазақстан облысы мен Ұлан ауданы әкімдігіне алғысымды білдіремін. Негізінен, қыран - күнге қарай тіке ұшатын жалғыз құс. Ешқандай адам баласы күнге қарай алмайды. Ал біздің қазақ дүниенің барлығына тіке көзқараспен қараған. Біздің бүкіл болмысымыз қыранмен байланысты”, - деді Бағдат Мүптекеқызы.
Айта кетейік, биыл Бозанбайда өтіп жатқан бүркітшілердің халықаралық фестиваліне 30 сұңқар мен 30 тазы ит, 80 бүркіт қатысуда. Оған еліміздің түпкір-түкпірінен және Ресей, Венгрия, Қытай, Моңғолия мемлекеттерінен келген құсбегілер мен итбегілер қатысып, бақ сынасуда. Бұл дүбірлі дода барысында 30 киіз үй тігілді.
Ажар Мұратқызы
Оқи отырыңыз
