Тарбағатай ауданында 2025 жылы білім беру саласында 3,5 млрд теңгеден астам қаржыға 14 жоба іске асады, деп хабарлайды Altainews.kz тілшісі.

Биыл Тарбағатай ауданының білім беру саласына айрықша көңіл бөлінуде. Аудан бойынша 2025 жылы жалпы сомасы 3 млрд 486,5 млн теңгеге 14 жоба қолға алынып отыр. Бұл – болашаққа бағытталған нақты қадам.

Соңғы екі жылда ауданның бірнеше ауылында жаңа мектептер пайдалануға берілді. 2023-2024 жылдары Шеңгелді, Шолақорда және Тәуке ауылдарында жаңа білім ошақтары бой көтеріп, оқушылар мен мұғалімдерге қолайлы жағдай жасалды.

Ал биыл Сарыөлең ауылында жаңа мектеп құрылысы басталды. Бұл шешім қоғамда түрлі пікір туғызғанымен, жергілікті билік оның стратегиялық маңызын атап отыр.

Аудандағы тағы бір өзекті мәселе – Қыдырбек Билялов атындағы мектеп-лицейдің ғимаратына күрделі жөндеу қажет. Сондай-ақ Тұғыл ауылындағы Шоқан Уәлиханов атындағы орта мектептің жанындағы қосымша ғимарат қайта жаңғыртылмақ.