Өскеменде жарықтандыру жүйесінің кешенді техникалық аудиті жүргізіледі. Бұл туралы бүгін облыс әкімдігінде жарықтандыру мәселелеріне арналған жиында белгілі болды.

Кейінгі кезде қала тұрғындарынан көшені жарықтандыруға қатысты айтылып жатқан сын көп. Тіпті, кей көшелерде жарық мүлдем жоқ. Ал бұл қылмыстың көбеюіне әкеліп соғуы мүмкін, деп хабарлайды Altainews.kz тілшісі.

Естеріңізге сала кетейік, облыс орталығындағы көше жарықтандыру жүйелерін жаңғырту 2020 жылы басталған. Жобаға сәйкес, қала көшелеріндегі қарапайым шамдар жарық диодты түріне ауыстырылуы керек болатын. Бұған қоса инфрақұрылымды дамытып, бірыңғай диспетчерлік орталық ашу көзделген-ді. Жоспар бойынша жоба аясындағы жұмыстар аяқталғаннан кейін электр қуатын үнемдеу көрсеткіші 60 пайызға дейін ұлғаюға тиіс еді.

Жоба әлі аяқталған жоқ, бірақ қазірдің өзінде бұл бағыттағы жұмыстардың сапасыз жүргізіліп жатқаны байқалады. Сала мамандарының айтуынша, Тайваньнан әкеліген жаңа шамдар тиімсіз болып тұр. Бұл шамдар тез істен шығады немесе мүлде жұмыс істемей қалады. Ал оларды жаңарту үшін әжептәуір шығындану керек.

Жиынға қатысқан облыс әкімі Ермек Көшербаев жарықтандыру мәселесі өте өзекті екенін айтып, бұл бағыттағы жұмыстарды созуға болмайтынын жеткізді.

Әлбетте, бұл жұмысқа сарапшы ретінде энергетика саласының ардагерлері де тартылмақ. Қолданыстағы желілерге кешенді техникалық аудит жүргізу көзделіп отыр. Заңбұзушылықтар анықталған жағдайда мәселе заң шеңберінде шешілетін болады.

Белгілі болғандай, көшелерді жарықтандыру жүйесінің жұмысын бір жыл ішінде реттеп, жолға қою жоспарланып отыр.