Мерзімді әскери қызметте Отан алдындағы борышын өткерген ақтөбелік Ануар Аринов мемлекет тарапынан ұсынылған мүмкіндіктің арқасында Шығыс Қазақстан облысындағы жоғары оқу орнына грантқа оқуға түсіп, студент атанды деп хабарлайды Altainews.kz.

Әскери борышын өтеу кезеңінде ұсынылған бұл бағдарлама жас сарбазға азаматтық өмірде жаңа мүмкіндіктерге жол ашты. Бір жылдан кейін Ануар университет жанынан ашылған Қабанбай батыр атындағы әскери кафедраға мерзімді әскери қызметін өткерген азамат ретінде байқаусыз қабылданды. Қазіргі таңда ол негізгі білімін алып қана қоймай, әскери кафедрада да қатар оқып жүр.

Айта кету керек, Ануар Аринов әскери отбасында тәрбиеленген сарбаз. Оның әкесі ұзақ жылдар бойы шекара қызметінде еңбек етіп келеді. Сондықтан Отанға қызмет ету Ануар үшін жай міндет емес, өмірлік ұстаным әрі саналы таңдау.

Мерзімді әскери қызмет тек борыш емес, болашаққа жол ашатын нақты мүмкіндік. «Срочник 2.0» бағдарламасы арқылы бүгінде көптеген жас сарбаз жоғары білім алып, елге қызмет етудің жаңа деңгейіне көтерілуде.