Жаңа Қанай ауылында арнайы әлеуметтік қызмет көрсету орталығының жаңа ғимараты салынады.

Ұлан ауданына қарасты Жаңа Қанай ауылындағы психикалық денсаулық орталығының жұмыс істеп тұрғанына ондаған жылдың жүзі болды. Қазіргі уақытта ғимарат корпустарының тозығы жеткен. Жергілікті билік 1947 жылы салынған ғимаратты жөндеудің орнына, жаңасын салу керек деп шешкен, деп хабарлайды Altaynews тілшісі.

Аталмыш орталықта науқастар ем алып қана қоймай, шағын елді мекен тұрғындарына жұмыс орындарын да ұсынып отырғанын айта кету керек. Бүгінгі күні онда 102 адам жұмыс істейді. Атап айтқанда, үш дәрігер, 28 орта медициналық қызметкер және техникалық мамандар бар. Барлығы да осы Жаңа Қанай ауылының тұрғындары.

ШҚО жұмыспен қамтуды үйлестіру және әлеуметтік бағдарламалар басқармасының мәліметінше, орталық кезегінде 125 адам бар. Десе де, қазіргі уақытта тозығы жеткен ғимарат көп адамды қабылдай алмайтын көрінеді.

ШҚО әкімі Ермек Көшербаев Ұлан ауданына жұмыс сапары барысында орталыққа барып, қысқа мерзімде жаңа нысан салу керектігін атап өтті. Ол аудан әкімдігі мен ШҚО құрылыс басқармасына заманауи санитарлық және құрылыс нормаларына сәйкес келетін жобаны әзірлеуді тапсырды. Ғимарат бірқабатты және "П" әрпі түрінде салынады. Сонымен қатар ауланы серуендеуге жабдықтау қажет. Әкімдік off-take келісімшарты бойынша өз есебінен ғимарат тұрғызып, оны мемлекетке сата алатын кәсіпорынмен ынтымақтастық мүмкіндігін қарастырмақ. Айта кету керек, бұл тәжірибе «Бірқабатты Шығыс» бағдарламасы аясында қолданылған.

Облыстық құрылыс басқармасы барлық қажетті құжаттамамен орталыққа арналған ғимаратты бір маусымда салуға болатынын хабарлады. Қазір орталық ШҚО денсаулық сақтау басқармасының балансында. Бірақ онда белсенді медициналық емдеуді қажет етпейтін адамдар тұратындықтан, жаңа ғимарат жұмыспен қамтуды үйлестіру және әлеуметтік бағдарламалар басқармасына қарайтын болады. Мекеменің атауы да өзгеріп, Жаңа Қанай арнаулы әлеуметтік қызмет көрсету орталығына айналады.