Жаңа Қанай ауылындағы Шығыс Қазақстан психикалық денсаулық орталығының қызметкерлері ұзақ жылдар бойы ескі және жабдықталмаған ғимаратта қызмет етіп, науқастар сонда ем алып келді. 

Аталған медициналық мекемеге барған облыс әкімі Ермек Көшербаев қалыптасқан жағдаймен танысып, жаңа ғимаратқа көшіретінін жеткізді, деп хабарлайды Altaynews тілшісі.

Шығыс Қазақстан облысының әкімі Ермек Көшербаевтың ардагерлермен кездесуінде ардагерлер Ұлан ауданының Жаңа Қанай ауылындағы психикалық денсаулық орталығының жағдайына назар аударуды сұрады. Сол кезде облыс әкімі ақсақалдарға медициналық мекемеге арнайы барып, жағдаймен танысуға уәде берген. Ұлан ауданына жұмыс сапары кезінде Ермек Көшербаев сол жерде болып, мекеме қызметкерлерімен сөйлесті. Орталық 60 адамға арналған, қазір 50-ге жуық науқас емделіп жатыр. Олармен білікті қызметкерлер жұмыс істейді. Алайда ғимараттың тозығы жеткен.

Өңір басшысы құзырлы мекемелерге осы мәселеге қатысты бірқатар тапсырма беріп, жаңа ғимаратқа көшіру жөніндегі іс-қимыл жоспарын әзірлеуді тапсырды.