Облыс орталығында дәрі-дәрмектер мен медициналық жабдықтарды сақтауға арналған заманауи қоймасы бар сауда-өндірістік кешені салынып жатыр,  деп хабарлайды Altaynews тілшісі.

Машиностроитель көшесінің бойындағы индустриялық аймақта бой көтеретін нысанның аумағы – төрт мың шаршы метр. Мұндағы әртүрлі температуралық режимдері бар бөлмелер мен мұздатқыштарда сақталатын дәрі-дәрмек бүкіл өңірді қамтуға жетеді.

Жалпы құрылыс 2019 жылы басталған. Пандемия кезіндегі шектеулерге мен мердігерлердің жауапсыздығына байланысты жұмыс созылып кеткен көрінеді. Жаңа мердігермен іс бастаған «Медсервис ПЛЮС» ЖШС өкілдері құрылыс жұмыстары келер жылдың басында аяқталады деп отыр.

«Бұл индустриялық аймақта жүзеге асатын алғашқы ауқымды жоба. Кешен бой көтерсе, біршама адамды жұмыспен қамтуға да мүмкіндік туады. Сондай-ақ алыс-жақын шетелден келетін дәрі-дәрмектер өңірдегі емханаларға дер кезінде жеткізіледі. Нысан құрылысы ойдағыдай жүрсе, жол салу мәселесі біздің мойнымызда, бұл жұмысты орындаймыз, –  деп сөз берді Өскемен әкімі Жақсылық Омар.