Биыл Өскеменде 6 бірдей кітапхана «Жұмыспен қамтудың жол картасы» бағдарламасы аясында жөндеуден өтеді. Оның ішінде О. Бөкей атындағы қалалық кітапхана күрделі жөндеуден өтіп, жаңаша жаңғырмақ.

Кітапхана директорының айтуынша, соңғы рет жөндеу жұмыстары мұнда 11-12 жыл бұрын жүргізілген екен. Оның өзінде кей жерлерінің ғана жыртығы жамалып, ағымдағы жөндеу болған. Едені суық, терезерінен жел азынап, оқырмандардың күйісін әбен кетіретін еді.

Енді биыл мұнда жылыту жүйесі де толығымен ауыстырылып, оқырмандар жайлы кітапханада уақыттарын өнімді өткізетін болады.

- Соңғы рет бұл кітапханаға жөндеу жұмыстары 2008-2009 жылы жүргізіліпті. Қазір едені мен төбесі ауыстырылып, қабырғалар боялып, өзгеше көрініс табуда. Кітапханашылар да биыл аңызақта тонбай, оқырмандар үшін тік тұрып қызмет ететін болады, - дейді О. Бөкей кітапханасының директоры Хабиба Ақжігітова.

Қазірде 45 мың оқырманы бар О.Бөкей кітапханасының қызметкерлері нысан күрделі жөндеуден өтіп, жаңғыртылғаннан кейін оқырмандар саны 2 есе өседі деп отыр. Бәрінен бұрын, жөндеу жұмыстары бітсе, тұрғындардың тіл үйренуі үшін лингвистикалық және цифрлық сауаттылыққа үйрететін арнайы зал ашылмақ.

- Халыққа қызмет көрсету орталықтары қарапайым анықтамаларды тұрығыдарға беру қызметін тоқтатып жатыр. Осылайша енді тек e-gov порталы арқылы алуға болады. Алайда тұрғындардың көбі бұл тұрғыда әлі де сауаты нашар. Сондықтан цифрфлық, компьютерлік сауаттылықты арттыру үшін арнайы кабинеттер бөлдік. Біздің кітапхана ыңғайлы жерде орналысқан, жастар көп келеді. Жөндеуден кейіп тіптен, мұнда адамның қарасы артып, оқырман саны көбейетініне сенімдімін, - дейді Хабиба Ақжігітова.

Нысанның жаңғыртылуына қазір 20 адам жұмыс істеп, атсалысып жүр, оның 10-ы - «Жұмыспен қамтудың жол картасы-2020» бағдарламасы аясында жұмыспен қамту орталығы арқылы жұмысқа тұрғандар. Ал жөндеу жұмыстары 31 маусымға дейін аяқталуы тиіс.

Айта кетейік, биыл Өкеменде 6 кітапхана жөндеуден өтеді. Атап айтқанда А. Пушкин атындағы кітапхана, Зағип және нашар көретін жандарға арналған кітапхана, О. Бөкей атындағы кітапхананың өзі және екі филалы – балалар кітапханасы мен Бульвар Гагаринадағы Бажов кітапханасы жөндеу көреді. .