Өскемен полицейлері үш күн ішінде екі мыңнан астам заң бұзушылықты анықтады, деп хабарлайды Алтайньюс тілшісі.

ШҚО полиция департаментінің мәліметінше, әсіресе қоғамдық орындарда ішімдік ішкендер мен көлікте қауіпсіздік белдігін тақпаған тұрғындар көп болған.

Естеріңізге сала кетейік, 26-28 тамыз аралығында полиция қызметкерлері қала жолдары мен көшелеріндегі тәртіпті бақылауды күшейткен болатын. Соның нәтижесінде 2484 заң бұзушылық анықталды. Оның тең жартысы – жол ережесін сақтамағандар болса, екінші жартысы – қоғамдық тәртіпті бұзғандар.

– Көлік рульінде телефон пайдаланғаны үшін 111 жүргізуші, қауіпсіздік белдігін тақпағаны 114 жүргізуші, мас күйінде көлік жүргізген 8 жүргізуші жауапқа тартылды. Қоғамдық орындарда ішімдік ішкен 69 тұрғын, ұсақ бұзақылық жасаған 81 тұрғын және көші-қон саласында заң бұзушылыққа жол берген 79 тұлға анықталды, – деп мәлімдеді Полиция департаментінің баспасөз қызметі.