Берел қорғандарындағы құнды жәдігерлер цифрлы форматқа көшеді
Өңірімізде Халықаралық Жастар күніне арналған ІX мобильдік медиа мектебі өтті. Аталмыш шара барысында Катонқарағай ауданындағы Берел қорық-музейінің құнды жәдігерлерін цифрлы форматқа көшіру және оларды сақтау бойынша шеберлік сағаттары өткізілді, деп хабарлайды Алтайньюс тілшісі.
«Берел мәдениеті: жәдігерлерді цифрлық форматқа көшіру» атты Халықаралық Жастар күніне арналған ІX мобильдік медиа мектептің өткізілуіне Қазақстан Республикасындағы Біріккен Ұлттар Ұйымы Жаһандық Коммуникация департаменті, әл-Фараби атындағы Қазақ ұлттық университеті, С. Аманжолов атындағы Шығыс-Қазақстан мемлекеттік университеті мұрындық болды.
С.Аманжолов атындағы ШҚМУ-дың Қазақстан тарихы кафедрасының меңгерушісі Роза Чекетаеваның айтуынша, әл-Фараби атындағы ҚазҰУ-дің Журналистика факультетінде ашылған журнилистика мектебі өңірлік БАҚ өкілдеріне арналған көшпелі семинарлар сериясын осыған дейін Оңтүстік Қазақстан, Павлодар облыстарында өткізген екен. Бұл жолғы кезек «Берел» Мемлекеттік тарихи-мәдени мұражай-қорығына келген екен.
– Үлкен Берел қорғандары аумағында өткізіліп жатқан семинардың жақсы жақтары көп, - дейді Роза Чекетаева. – Оның қатысушылары жәдігерлермен, көшірмелермен, сызбалармен жұмыс істеп, басқа да зерттеулер жүргізеді.
Медиа мектеп жұмысы барысында Берел мәдениетін цифрлы форматқа көшіру және тарихи жәдігерлерді сақтау модульдары бойынша қазба жұмысына келген археолог-студенттерге семинарлар, шеберлік сағаттары өткізілді. Жастар жылы аясында Халықаралық жастар күнін архелог студенттермен бірге атап өтуді мақсат тұтқан шарада қатысушылар «Берел» мемлекеттік тарихи-мәдени қорық-мұражайын аралап, қорғандағы қазба жұмыстарымен танысты. Сондай-ақ, жастар «Берел және Шілікті қорғандарының ұқсастығы мен айырмашылығын анықтайық» тақырыбында топтық жұмыс орындап, Венн диаграммасын құрап шығарды.
– Берел қорғандары Шығыс Қазақстанның ғана емес, сондай-ақ тұтастай еліміздің брендіне айнала білді, - дейді белгілі археолог, профессор Зейнолла Самашев. – Жақында бұл жерде Халықаралық суретшілер бірлестігі үлкен жұмыс жүргізді. Қорған аумағы суретшілер мен фототілшілер бас қосатын орынға айналуда.