Украина Президенті Петр Порошенко Семейдің қызын алған ба? СТРАНА.ua атты сол елдің жаңалықтар порталы Марина ханымның ресми деректердегі өмірбаяны өтірік екенін жазды. «Марина Порошенко 1962 жылы Киевте дүниеге келмеген. Қазақстанның Семей деген қаласында туған» дейді. Бұл дерек Украинаның құқық қорғау органдарынан алынып отырған көрінеді, деп хабарлайды Алтайньюс тілшісі.

Портал, керек десеңіз, Ішкі істер министрлігінен алынған Марина Порошенконың туған жерін айғақтайтын құжаттың суретін де ұсынып отыр.

Сонымен, олардың не жазғанын қысқаша баяндай кетейік. Семей деген – отандық өнеркәсібі дамыған, бір кездері (КСРО кезінде) ядролық полигонмен аты шыққан шағын қала екен. Одақтағы алғашқы жерасты сынағы осында жасалыпты. Бұл жабық қала болғандықтан, әскерилер мен зауыт қызметкерлері ғана кіріп-шығып тұрған. Марина Порошенко туған кезде де қала маңында сынақтар өтіп тұрыпты.

Марина ханым дүниеге келмей тұрып, оның шешесі – Людмила Переведенцева Киевтегі «Арсенал» зауытында жұмыс істепті. Өте қат маман болса керек, сол уақытта іссапармен Семейге жөнелтілген болуы мүмкін.

– Одақтың ядролық өнеркәсібін дамыту үшін Л. Переведенцева ұзақ уақытқа Семейге іссапарға жөнелтілген деп болжауға болады, – деп жазды СТРАНА.ua. Болжамдарына сенсек, Марина ханым осы аралықта дүниеге келген.