ШҚО-да көктемгі әскерге шақыру науқаны басталды. Бұл туралы Өскемен гарнизонының баспасөз қызметі хабарлады.

Облыстың Қорғаныс істері жөніндегі департаментінде мерзімді әскери қызметке шақыру науқаны  басталды. Азаматтарды әскерге шақыру талабына сәйкес, жергілікті әскери басқару органдарына іріктеу жұмыстарын жүргізу  жүктелген, деп хабарлайды Altaynews тілшісі.

ШҚО Қорғаныс істері жөніндегі департаментінде өңірдегі аудан-қалалардан жіберілген жастарды психологиялық, кәсіби және медициналық тексеруден өткізіп жатыр. Әскерге шақырылушылардың денсаулық жағдайын анықтау үшін қажетті жабдықтар мен тиісті сала мамандары жеткілікті.

Әскер қатарына қабылданған соң олар үш ай бойы оқу орталықтарында әскери  дағдыларды үйренеді екен.

 Борышын өтеген азаматтар ары қарай келісім шартпен әскери қызметке қалуға мүмкіндіктері бар.

Үш күн ішінде медициналық комиссияның бақылауынан өтетін болашақ сарбаздар тиісті әскери бөлімдерге бөлінген.

Шығыс Қазақстан бойынша барлығы 600-дей сарбаздың жүзге жуығы Шекара қызметінде, 180-нен астамы Қарулы күштер қатарында, ал 230-дың үстінде – Ұлттық ұлан сапында, 30 азамат ТЖМ-да борышын өтейді.