Шығыс Қазақстан облысының ең үздік спортшылары таяу уақытта төрт жылда бір өтетін ең ірі қысқы спорт додасына тұтас Қазақстанның абыройын қорғайды. Айта кетейік, XXV қысқы Олимпиада ойындары 2026 жылғы 6–22 ақпан аралығында Италияның Милан және Кортина-д’Ампеццо қалаларында өтеді, деп хабарлайды Altainews.kz тілшісі.

Халықаралық лицензиялық іріктеуден өткен өңірдің төрт спортшысы еліміздің фристайл-могулдан ұлттық құрамасына енді. Атап айтқанда, әлемдік могул фристайлында үнемі үздіктер қатарынан көрініп жүрген, халықаралық жарыстардың жеңімпазы әрі жүлдегері Анастасия Городко, Қазақстандағы ең тәжірибелі әрі нәтижелі могулистердің бірі, ірі турнирлерде тұрақты түрде жоғары нәтиже көрсетіп жүрген спортшы Павел Колмаков, әлемдік фристайл элитасында өз тұғырын алған, болашағынан зор үміт күтетін Аяулым Әмренова және еліміздің еңбек сіңірген спорт шебері, Олимпиада ойындарының қола жүлдегері, әлем чемпионаттары мен Әлем кубогі кезеңдерінің бірнеше дүркін жүлдегері, Қазақстанның қысқы спорт тарихындағы ең атақты спортшылардың бірі Юлия Галышева.

Спортшылармен өткен кездесуде ШҚО әкімі Нұрымбет Сақтағанов додалар дүбірінде ойып орын алатын Олимпиада ойынының маңызын және ұлттық құрама сапында бой түзеген жерлестеріне жүктелер жауапкершілік деңгейін ерекше атап өтті.

Сондай-ақ, әкім спортшылардың жетістігіне үлес қосып жүрген бапкерлерге, дәрігерлерге, мамандарға және күн сайын спортшылармен бірге еңбек ететін барлық жандарға алғыс білдірді. Дәл осы командалық жұмыс, жүйелі тәсіл мен кәсіби дайындық Олимпиада деңгейіне шығуға мүмкіндік береді.

Ал халықаралық дәрежедегі спорт шебері Павел Колмаков мақсатының айқын екенін ашық айтты.

Өңір басшысы Олимпиадаға қатысатын спортшыларға және бапкерлер құрамына зор денсаулық, өз мүмкіндіктеріне сенім және халықаралық ареналарда сәтті старттар тіледі.

Айта кетейік, XXV қысқы Олимпиада ойындары 2026 жылғы 6–22 ақпан аралығында Италияның Милан және Кортина-д’Ампеццо қалаларында өтеді. Дүбірлі додада әлемнің 93 елінен 3500-ден астам спортшы бақ сынап, 16 спорт түрі бойынша жүлделер сарапқа салынады.

Қазақстан спортшыларының Олимпиадаға қатысуы Халықаралық Олимпиада комитеті мен халықаралық федерациялар аясында өткізілген күрделі халықаралық лицензиялық іріктеуден сәтті өтуінің нәтижесінде мүмкін болды. Фристайл-могулдан Қазақстан құрамасының өкілдері алдағы ойындарда ел намысын жоғары деңгейде қорғауға әзір екенін және биік мақсат-міндеттерді көздейтінін тағы бір мәрте дәлелдеп отыр.

Дамир Омаров

Видео: Жәнібек Ырысбай

Фото: Махаббат Ахметжанова