Бүгін облыс орталығында "AMANAT" партиясы ШҚО филиалының кезектен тыс XXXII конференциясы өтті. Жиын барысында Мемлекет басшысы Қасым-Жомарт Кемелұлы Тоқаевтың «Әділетті Қазақстанның экономикалық бағдары» атты Қазақстан халқына Жолдауы талқыланды.

Ел Президенті су мәселесіне ерекше тоқталғаны белгілі. Конференцияда сөз алған "AMANAT" партиясы ШҚО филиалының төрағасы Сайрангүл Жұмаділова өңірдегі су қоймаларының жағдайына тоқталып өтті, деп хабарлайды Altaynews тілшісі.

Сондай-ақ ол жаңадан құрылған Су ресурстары және ирригация министрлігі Тарбағатай ауданындағы «Қандысу» қоймасына күрделі жөндеу жүргізу үшін қаржы бөлетініне үмітті екенін де жеткізді.

Экология, геология және табиғи ресурстар министрлігінің су ресурстары комитетінің «Қазсушар» мемлекеттік кәсіпорыны ШҚО филиалының директоры Нұржан Амиржанов та облыстағы республикалық меншіктегі 4 су қоймасы да жөндеуді қажет ететінін атап өтті.