Облыс әкімімен кездесу барысында тұрғындар Өскемен қаласының жаңа ықшам аудандарына қатынайтын қоғамдық көліктер санына қатысты да сауал жолдады. Мәселен, Өскемен қаласы, Әлия Молдағұлова көшесінің тұрғыны Сабыр Оспанов қоғамдық көліктер санын әлі де көбейте түссе деген өтінішін білдірді, деп хабарлайды Altainews.kz тілшісі. 

Өз кезегінде аймақ әкімі соңғы жылдары облыс орталығына 203 үлкен автобус және 48 шағын автобус сатып алынғанын атап өтті.

Аймақ басшысының айтуынша, бұл мәселе үнемі тұрақты бақылауда ұсталынады. Себебі, қала өмірінде өскемендіктердің жұмысқа кешікпей баруын, оқушылардың суыққа ұрынбай мектепке тез жетуін қамтамасыз ету – ең бірінші кезектегі мәселе.

Өскеменде дәл қазір 63 бағытта қоғамдық көліктер жүріп тұр. Жаңа бағыттарды ашу жұмыстары жүйелі түрде жалғасады. Сол мақсатта Өскемен қаласының әкіміне автобус тоқтайтын аялдамаларды заманауи талапқа сай орнатуға, қоғамдық көлік айналып өте алатындай етіп жолдарды кеңейтуге, автобустардың кестеден кешікпеуіне бақылау жасауға тапсырма берілді.  

Дәурен Аллабергенұлы

Артем Жигулин

Махаббат Ахметжанова