Шемонаиха ауданына қарасты Межовка ауылында медициналық пункттің құрылысы жақын күндері аяқталады.

Жуырда Мемлекет басшысы Қасым-Жомарт Тоқаевтың тапсырмасы бойынша ауыл тұрғындарының денсаулық жағдайын жақсартуға бағытталған «Ауылдық денсаулық сақтауды жаңғырту» жобасы әзірленген болатын. Қазір өңірде аталған жоба аясында бірқатар медициналық нысандар бой көтеруде, деп хабарлайды Altaynews тілшісі.

ШҚО бойынша 2023-2024 жылдары 36 алғашқы медициналық-санитарлық көмек мекемесін салу жоспарланған.

100-ден астам ғана тұрғыны бар Межовка ауылының халқы медициналық пункттің құрылысы басталғанына қуанышты.

Бүгінде құрылыс аяқталып, мердігер медициналық пункттің айналасын абаттандыру жұмыстарын жүргізіп жатқан көрінеді.

Аталған медициналық мекемелерде жүкті әйелдер мен балалардың денсаулығына баса назар аударылады. Оларды қабылдау үшін жеке кабинеттер қарастырылмақ.