Даниал Ахметов Израильдің Қазақстандағы елшісімен кездесті
ШҚО әкімі Даниал Ахметов Израиль мемлекетінің Қазақстандағы Төтенше және Өкілетті Елшісі Лиат Вексельманмен кездесті. Кездесу барысында тараптар бірқатар әлеуметтік және ауыл шаруашылығы жобаларына қатысты жоспарларды талқылады.
- Біз Израильмен денсаулық сақтау саласындағы ынтымақтастықты нығайтуға және дамытуға ерекше мүдделіміз. Биыл облысымыздан 150-ге жуық маманды шетелдік клиникаларға үш айдан астам мерзімге оқуға және біліктілігін арттыруға жіберуді жоспарлап отырмыз. Негізгі бағыттар - онкология, кардиология және босандыру. Қаржыландыру аймақтық бағдарлама аясында жүзеге асырылады, - деп атап өтті Даниал Ахметов.
Ал Лиат Вексельман елшілік тарапынан бұл мамандардың барлығын өздерінде оқыту мүмкіндігін қарастыру және жан-жақты қолдау білдіру бойынша келіссөздер ертең басталатынын жеткізді.
Бұдан басқа, пандемияға байланысты жағдай тұрақталғаннан кейін өңірдің АӨК субъектілері үшін бірлескен бизнес-форум өткізу туралы уағдаластыққа қол жеткізілді.