Өскемендегі №4 қалалық аурухананың травматолог-дәрігерлері аз инвазивті операциялардың көмегімен буындары жарақаттанған пациенттерге белсенді өмір сүруге, тіпті спортпен шұғылдануға мүмкіндік береді. Травматология бөлімшесінің меңгерушісі, ортопед-дәрігер Айдос Кунияров өз тәжірибелерінде қолданып жүрген инновациялық технологиялар туралы айтып берді, деп хабарлайды Altainews.kz тілшісі Медициналық әлеуметтік сақтандыру қоры облыстық филиалының баспасөз қызметіне сілтеме жасап.

Көптеген спортшылар тізе буынының зақымдануы мен тізедегі шеміршек жастықшасы – менисканың жыртылуы қандай қиындықтарға әкелетінін біледі. Мениска жүрген кезде амортизатор және тұрақтандырғыш рөлін атқаратыны белгілі. Бұрын мұндай жарақат алған науқас  кем дегенде алты ай төсекке таңылып, содан кейін ұзақ уақыт оңалтудан өтетін. Пациент қайтадан жүріп үйренетін.

Қазіргі заманғы медицина, әсіресе травматология және ортопедия саласында белсенді түрде енгізіліп жатқан жаңа әдістер мен технологиялар адамның тірек-қимыл аппаратының барлық функцияларын толығымен қалпына келтіруге мүмкіндік береді.

Ортопед-дәрігердің айтуынша, ота жасауға көрсетілім болған кезде, буынға бірден МРТ зерттеуі жасалып, буындағы сіңірлердің, шеміршектердің зақымдануы анықталады.

Айдос Кунияров тізе буынына жасалған пластикалық отаға нақты мысал келтірді. Өскемен қаласының 27 жастағы тұрғыны бірнеше ай бұрын оң тізе буынынан жарақат алған. МРТ зерттеуі тізе буыны байламдарының толық жыртылғанын көрсетті. Дәрігер бұл жарақат кейін   артрозға әкелуі мүмкін екенін, жігіт тіпті мүгедек болып қаупі болғанын айтты. 

№4 қалалық аурухананың травматолог-хирургтары сонымен қатар, иық буынының жарақаттарына сәтті операция жасап жүр, артроздан зардап шеккен буындарды эндопротездейді. Жамбасы сынған жасы келген науқастарға толық айығып кетуге мүмкіндік береді. Бұрын мұндай жарақаттан кейін мүгедек болып қаупі жоғары болатын.