4 мамыр күні Оралхан Бөкей атындағы орталық кітапханада 1941-1945 жылдардағы Отан соғысының батырлары Бауыржан Момышұлы, Қасым Қайсенов, Хиуаз Доспанова, Әлия Молдағұлова және  Мәншүк Мәметова туралы кино-сабақ өтті.

Батырлар ерлігін оқушылардың санасына сіңіріп, ерлігін дәріптеуге бағытталған сабақ 2-6 мамыр аралығында өтетін «Қазақ тарихи көркем фильмдері  мен кітаптарының апталығы» аясында ұйымдастырылған, деп хабарлайды Altaynews тілшісі.

Кітапхана қызметкерлері оқушыларға батырлар туралы деректер оқып, олардың білімін де тексерді.  

Кино-сабақ аясында жеткіншектерге Шәкен Айманов атындағы «Қазақфильм» киностудиясы 2002 жылы  Сағатбек Махмұттың режиссерлігімен түсірген «Партизан Қасым Қайсенов немесе жай ғана Вася» деректі фильмінен, 2010 жылы режиссер Қалила Омаров түсірген «Қазақтың Бауыржаны» көркем  фильмінен үзінді көрсетілді.

Оқушылар назарына Қасымбек Қайсенов батыр атасы Қ.Қайсенов туралы естелігін баяндаған «Менің атамның тарихы» атты бейнеролик және 2013 жылы Қазақстан, Ресей, Украина бірлесіп түсірген «Таңдауға құқы жоқ» атты көркем фильмнен үзінді ұсынылды.

Сонымен қатар оқушылар Хиуаз Доспанова туралы «Қазақ қызы – түнгі мыстан» атты қысқаметражды фильмді, «Әлия Молдағұлова» және «Мәншүк Жиенғалиқызы Мәметова – Кеңес Одағының батыры» атты деректі фильмдерді тамашалады.

Көркем фильмдер мен кітап көрмесінің апталығы «Казцинк» ЖШС, «Қазақфильм» киностудиясы және Өскемен қаласы әкімдігінің қолдауымен өтіп жатыр.