Облыстық әкімдікте «Ардагерлер ұйымы» республикалық қоғамдық бірлестігі Шығыс Қазақстан облыстық филиалының кезекті пленумы өтіп, онда Мемлекет басшысының «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауын іске асырудағы облыстық ардагерлер ұйымдарының рөлі мен мен маңызы кеңінен талқыланды, деп хабарлайды Altainews.kz тілшісі.

Қазіргі таңда облыста 134 мыңнан астам зейнеткер бар. Күн санап қатары сиреген әр ардагерге әлеуметтік қолдау көрсетуге бағытталған жұмыстарда аз емес. Жыл сайын соғыс ардагерлеріне, тыл еңбеккерлеріне, ұрыс қимылдарына қатысушыларға және Чернобыль АЭС-індегі апаттың салдарын жоюға қатысқан азаматтарға мерекелік әрі атаулы күндерге орай облыстық бюджеттен материалдық көмек көрсетіледі. Ағымдағы жылы 5 мыңнан астам ардагерге 604 млн теңге бөлінген.

Шығыс Қазақстанда Ұлы Отан соғысына теңестірілген 4 мыңнан астам ардагер тұрады, олардың ішінде қазіргі уақытта Ұлы Отан соғысының 8 қатысушысы бар.

Аймақтағы ақылдың кені саналар ардагерлер бас қосқан алқалы жиында сөз алған облыс әкімі Нұрымбет Сақтағанов еліміздің қарқынды дамуы жолындағы қол жеткізген толағай табыстар мен айтулы жетістіктер, ең бірінші кезекте, ардагерлер негізін қалаған, бірлік пен ынтымақтың арқасы, ерен еңбектің жемісі екенін атап өтті. Осы құндылықтарды жас ұрпақтың бойына дарытып, тәуелсіз елдің озық ойлы азаматтарын тәрбиелеу ісінде аға буынның рөлі айрықша маңызға ие екені де сөзсіз.

Бүгінде Шығыс Қазақстанда 140 мыңнан астам зейнеткер тұрады. 121 мыңнан астам адамды біріктіретін 13 ардагер ұйымы қоғам өміріне белсене араласып, ауқымды жұмыстар атқарып келеді.

Аға буынның ақылы мен даналығын ешқандай жасанды интеллект алмастырмайды

Басқосуда күн тәртібіне шығарылған «Жасанды интеллект» тақыбына қатысты сөз алған Шығыс Қазақстан облысының Цифрландыру және архивтер басқармасының басшысы Қайрат Бимағамбетов аға буынның ақылы мен даналығын, өмірлік мол тәжірибелерін ешқандай жасанды зерде алмастыра алмайтығын нақты мысалдармен келтірді. 

Басқарма басшысы айтқандай, қауіпсіздік саласында камералар тек видео түсіріп қана қоймай, адамның көшеде құлап қалғанын немесе түтін шыққанын байқап, тиісті қызметтерге белгі береді. Бұл – адам өмірін сақтауға көмектеседі.

Құрмет пен қолдау ешқашан бәсеңдемейді

Облыста ардагерлерге лайықты қамқорлық пен әлеуметтік қолдау көрсету ешқашан бәсеңдеген емес. Лайықты қарттыққа жағдай жасау — мемлекеттің әлеуметтік саясатының негізгі міндеттерінің бірі. Шығыс Қазақстанда зейнет жасындағы азаматтарды қолдау мәселелеріне тұрақты әрі жан-жақты көңіл бөлінеді. Өңірдің барлық қалалары мен аудандарында қарт адамдардың денсаулығын нығайтуға, олардың әлеуметтік белсенділігін арттыруға және қажетті қамқорлықпен қамтамасыз етуге бағытталған ауқымды жұмыстар жүргізілуде.

Қариялардың өмір сапасын жақсартуда белсенді ұзақ өмір сүру орталықтарының жұмысы туралы облыстық жұмыспен қамту және әлеуметтік бағдарламаларды үйлестіру басқармасы басшысының орынбасары Әсел Түлепова баяндады.

Оның айтуынша, аға буын өкілдерін қоғамдық және қоғамдық-саяси өмірге тарту мақсатында кешенді облыстық іс-шаралар жоспары бекітіліп, табысты жүзеге асырылуда.

Бұдан бөлек, аға буын өкілдеріне дене шынықтыру, мәдениет және спорт нысандарына еркін қолжетімділік қамтамасыз етілген. Зейнеткерлер бассейндерге барып, үстел теннисімен, жеңіл атлетикамен және басқа да белсенділік түрлерімен тұрақты айналысады. Белсенді ұзақ өмір сүру тұжырымдамасы аясында қолжетімді нысандар саны артып келеді. Қазіргі таңда шамамен 4 мың зейнеткер 175 алаңда орналасқан 292 секцияда шұғылданады.

Ағымдағы жылдың наурыз айында облыс орталығында Белсенді ұзақ өмір сүру орталығы ашылған. Бұл – аға буын үшін толыққанды, мазмұнды әрі салауатты өмірге жасалған маңызды қадам.

Бұл жобаның жүзеге асырылуы аға буынды қолдауға және құрметтеуге бағытталған бастамалардың жоғары әлеуметтік маңызын көрсетті. Жиналған оң тәжірибені бекітіп, алдағы уақытта жыл сайынғы дәстүрлі форматта жалғастыру жоспарланып отыр. Бүгінде Катонқарағай ауданында Достық үйі базасында Белсенді ұзақ өмір сүру орталығының филиалын ашу мүмкіндігі қарастырылуда. Бұл шалғай ауыл тұрғындары үшін әлеуметтік және сауықтыру қызметтеріне қолжетімділікті кеңейтіп, қарт азаматтардың әлеуметтік белсенділігі мен өмір сапасын арттыруға, сондай-ақ әлеуметтік оқшаулану деңгейін төмендетуге мүмкіндік береді.

Бұдан бөлек, облыстың барлық қалалары мен аудандарында осындай орталықтар желісін кеңейту, олардың жұмыс істеу жағдайын жақсарту және қызмет бағыттарын дамыту жоспарлануда. Аталған бағыттағы жұмыс тұрақты бақылауда және кезең-кезеңімен жалғасын таппақ.

Ардагерлер марапатталды

Пленум барысында өңірдің қоғамдық өміріне белсене араласып жүрген ардагерлердің бастамалары, әлеуметтік-мәдени бағыттағы жұмыстар мен ұрпақтар сабақтастығын нығайтуға қосқан үлесі жан-жақты талқыланды. Сонымен қатар, іске асқан жобаларға баға беріліп, келер жылға арналған міндеттер нақтыланды.

Жиынның қорытындысында өңір дамуына, мәдениеті мен руханиятына, жас буынды отансүйгіштікке тәрбиелеуде еселі үлес қосып жүрген бірқатар ардагер облыс әкімі Нұрымбет Сақтағановтың Алғысымен және «Ардагерлер ұйымы» РҚБ Орталық кеңесінің Құрмет белгісімен, Құрмет грамотасымен, Алғыс хатымен марапатталды.

Олардың қатарында Өскемен титан-магний комбинаты ардагерлер ұйымының төрағасы Жамантай Қажмұратов, облыстық ардагерлер кеңесі мүшесі Серік Тыныбаев, Өскемен қалалық ардагерлер кеңесінің төрағасы Олег Фролов, Үлкен Нарын аудандық ардагерлер кеңесі төрағасы Ержан Қалиахметов, Күршім аудандық ардагерлер кеңесі төрағасы Бақытзан Өлмесеков, Ұлан ауданы, Қасым Қайсенов кенті бастауыш ардагерлер ұйымы төрағасы Амангелді Уәлиев, Алтай ауданы, Никольск ауылындағы бастауыш ұйым жетекшісі Любовь Вайцель, Риддер қалалық «Память» ардагерлер хоры жетекшісі Галина Чапаниди бар. 
Сондай-ақ, еңбек ардагері, облыстық тексеру комиссиясы төрағасы Айтмұханбет Құрманғалиев және Глубокое ауданы, Белоусовка кенті бастауыш ұйымының төрағасы Любовь Дружинина Шығыс Қазақстан облысының «Құрметті ардагері» белгісімен марапатталды.  

Дәурен Аллабергенұлы
Фото: Артем Жигулин
Видео: Евгений Щетников