Өскемен: Жерде ақ түсті сұйық қалдықтар пайда болуына байланысты тексеру жүргізілді
Видеодан скринделген сурет
Облыс орталығында жердің ақ түске боялуына қатысты тексеру жүргізілді.
Әлеуметтік желіде «Өскемен титан-магний комбинаты» АҚ құбырының жарылып, салдарынан жердің ақ түске боялғаны жайлы видео тараған болатын, деп хабарлайды Altaynews тілшісі.
ШҚО экология департаменті баспасөз қызметінің мәліметіне сүйенсек, «Өскемен титан-магний комбинаты» АҚ-ның қалдық жинағышы құбырының бір бөлігі жарылып, сол күні бірден қалыпқа келтірілген көрінеді.
- Одан төгілген сұйықтықтың аппақ түсті болуы оның құрамында ауыр металдарды бейтараптандыратын әкті сүттің қосылуына байланысты. Суды тазартудың бұл технологиясы барлық металлургиялық зауыттарда қолданылады, - дейді ШҚО экология департаменті.
Қазіргі уақытта учаскеде аумақты тазарту жұмыстары аяқталған. Қоршаған ортаға ешқандай залал келтірілген жоқ.
