ШҚО-да жүрек-қан тамыры аурулары бойынша өлім-жітім азайды
Жүрек-қан тамырлары жүйесінің аурулары адамның денсаулығына, өміріне үлкен қауіп төндіреді.
ШҚО-да қазір диспансерлік есепте 200 мыңға жуық адам тұр. Оның ішінде 150 мыңға жуық адам гипертониямен, бес мыңға жуық адам стенокардия және жүрек жеткіліксіздігіне әкеліп соғатын жүректің ишемиялық ауруымен ауырады, деп хабарлайды Altaynews.kz тілшісі.
Облыстың бас кардиологы Наталья Полторанинаның айтуынша, өңірде жүрек-қан тамырлары жүйесінің аурулары бойынша өлім-жітім көрсеткіші төмендеген екен. Бұған медицина саласында қабылданып жатқан бірқатар шаралардың арқасында қол жеткізіліп отыр.
Сондай-ақ ол жүрек ауруымен ауыратын облыс тұрғындары МӘМС аясында қандай көмек алатыны туралы егжей-тегжейлі айтып берді.
Наталья Андреевна жүрек ауруларының алдын алу бойынша шараларды неғұрлым ерте бастаса, соғұрлым жақсы екенін айтады.
- Гипертония - инфаркт пен инсульттің негізгі себебі. Әрбір сырқат бізге түрлі белгі беретінін есте ұстаған жөн. Өз денсаулығыңызға көбірек көңіл бөліп, уақытында дәрігермен кеңесуді ұмытпаңыз,— деп түйіндеді ол.
