Елдің әскери құрылымдары мен құқық қорғау органдарында қызмет атқаратын азаматшалар аз емес.

Өскемен қаласындағы Полиция басқармасы, Солжағалау, Үлбі және Ертіс полиция бөлімінде барлығы 1200-дей қызметкер болса, соның 311-і нәзік жандар, деп хабарлайды Altainews.kz тілшісі.

Бұл арулар ерлермен бірге иық тірестіре қоғамның қауіпсіздігін қамтамсыз етіп, қылмыс пен заңбұзушылықтардың алдын алу міндетін мінсіз атқарып келеді.

Мәселен, сондай бұрымдылардың бірі - Кажыбаева Раушан Советқызы. Ол Үлбі полиция бөлімінің кәмелетке толмағандардың істері жөніндегі учаскелік полиция аға инспекторы. Раушан отбасы династиясын жалғастыруды мақсат тұтқан.

Осы салада қызмет етіп келе жатқанына биыл 16 жыл болды.

Раушан Советқызының қызметі әрі қиын, әрі аса жауапкершілікті қажет етеді. Өйткені оның алдында 18 жасқа толмаған жасөспірімдердің құқықтары мен бостандықтарын қорғау, олардың құқық бұзушылықтар мен қоғамға қарсы өзге де әрекеттер жасауының алдын алу, болдырмау және кәмелетке толмағандарды тәрбиелеу, оқыту бойынша өздерінің міндеттерін орындамайтын, сондай-ақ олардың мінез-құлқына теріс әсер ететін ата-аналарды анықтап, оларды түзу жолға салу міндеті тұр.

Раушан Советқызы  ішкі істер органдарында қызмет етудің әйел заты үшін оңай емес екенін де жасырмайды.