Биыл Шығыс Қазақстан облысында жылыту маусымы 26-қыркүйектен басталып кетті. Бүгінгі таңда барлық бюджеттік ұйымдар жылумен жабдықтауға қосылған. Ал көппәтерлі тұрғын үйлердің 99% жылыту маусымына дайын. Үйлерді жылумен жабдықтауға кезең-кезеңімен қосу жұмыстары жүргізілуде. Өңірлік коммуникациялар қызметінде өткен брифингте Шығыс Қазақстан облысы энергетика және тұрғын үй-коммуналдық шаруашылық басқармасының тоғыз айдағы жұмыс қорытындысы туралы басқарма басшысы Нұрлан Рамазанов айтып берді, деп хабарлайды Altainews.kz тілшісі.

Басқарма басшысы жөндеу жұмыстарының көлемі былтырғымен салыстырғанда екі есе көп болғанын айтты.

Облыс орталығында 12,9 км жылу жүйелері қайта құрылды және күрделі жөндеуден өтті. Облыста жөнделеді деп жоспарланған 68,5 км жылу желілерінің 67,9 км (99%) жөнделді. 603 км электр беру желілеріне, 41 қосалқы станцияға жөндеу жүргізілді.

Сонымен қатар, ағымдағы жылы Риддер ЖЭО-да жөндеу-қалпына келтіру жұмыстарына ерекше назар аударылды. Үкіметтің қолдауымен жылу желілерінің 55 учаскесін жөндеу және қаланың 19 км желісін ауыстыру аяқталды. Қыркүйек айында ыстық су қайта беріле бастады,  жылыту маусымында  екі қазандық іске қосылды. Тағы екі қазандықтың жөндеу жұмыстарын 15 қарашаға дейін толық аяқтау жоспарланған.