Шығыс Қазақстан облысының Сыбайлас жемқорлыққа қарсы қызметі ветеринариялық қызметтер саласындағы әкімшілік кедергілерді жойып, кәсіпкерлерге қатысты әділетсіз жағдайларды реттеді. Бұл жұмыстар «Бизнес жол» жобасы аясында жүзеге асырылды. Жоба кәсіпкерлерге әкімшілік және бюрократиялық кедергілерді еңсеруге, сондай-ақ мемлекеттік органдардың шешімдер қабылдаудағы ашықтығын қамтамасыз етуге бағытталған, деп хабарлайды Altaynews.kz тілшісі.  

Жобаның іске асырылу барысы туралы ШҚО Сыбайлас жемқорлыққа қарсы қызметінің басшысы Денис Шакенов Өңірлік коммуникациялар орталығында өткен брифингте мәлімдеді.

Ветеринариялық қызметтер мониторингінің нәтижесінде бірқатар жүйелі проблемалар анықталды. Бір ауданда мал шаруашылығы үй-жайлары мен көлік құралдарын дезинфекциялаумен байланысты ақылы қызметтер мәжбүрлі түрде көрсетілген 120 жағдай тіркелді. Алайда бұл аймақта эпизоотиялық ошақтар болмаған, сондықтан мұндай қызметтер міндетті емес еді.
  
Сонымен қатар, ветеринарлық дәрігерлер №1 нысанды ветеринарлық анықтамаларды беру кезінде 52 рет жануарларды тасымалдау үшін көлік құралдарын қосымша ақылы дезинфекциялау қызметін жүктеген.

155 жағдай бойынша іс жүзінде көрсетілмеген дезинфекция қызметтеріне ақы алынғаны анықталды. Кәсіпкерлерден төлемдер қабылданғанымен, қызмет көрсету туралы құжаттар (түбіртектер мен актілер) болмаған.

Заңсыз тәжірибелер толығымен тоқтатылды, кінәлі тұлғалар тәртіптік жауапкершілікке тартылды. Алдағы уақытта осындай бұзушылықтарды болдырмау үшін жүйелі шаралар қолға алынды.