Шығыс Қазақстан облысының таулы аймақтарында соңғы күндері мол жауын-шашын түсуіне байланысты қар көшкіні қаупі жоғарылады. Желдің күшеюінен қар көшкіні ошақтарында қар қалқандары мен жел соққылары қалыптасып, өздігінен түсу қаупін тудырып отыр.

Осы қауіптің алдын алу мақсатында ҚР ТЖМ "Қазселденқорғау" ШҚ филиалының мамандары мен ШҚО ТЖД құтқарушылары қар массасын қауіпсіз түсіру бойынша арнайы жұмыстар жүргізді.

"Өскемен – Алтай – Рахман қайнары" автожолының қауіпті учаскесінде жүргізілген шаралар нәтижесінде 380 текше метр қар түсірілді. Бұл аймақта ҚР ТЖМ "Қазселденқорғау" ШҚ филиалының бақылаушылары тұрақты мониторинг жүргізетін 10 қар көшкіні шоғырлары бар.

ҚР ТЖМ "Қазселденқорғау" және ШҚО ТЖД тұрғындарға қауіпсіздік шараларын сақтауды ескертеді. Егер қар көшкіні қаупі туралы дауылды ескерту жарияланса, таулы аймақтарға барудан бас тарту ұсынылады.

ШҚО ТЖД баспасөз қызметі