Шығыс Қазақстан облыстық филиалының партиялық бақылау комиссиясының төрағасы Мұхтар Төлеген Шемонаиха ауданына жұмыс сапарымен барып, аудан басшысы Дидар Кеңесбаевпен және мәслихат депутаттарымен бірге әлеуметтік нысандардың құрылысын бақылау мақсатында мониторинг жүргізді, деп хабарлайды  Altainews.kz тілшісі.

Комиссия мүшелері ең алдымен Шемонаиха қаласында салынған жаңа 300 орындық мектепке барды. Партия өкілдері сынып бөлмелерін, спорт залын, АӘД кабинетін, асхананы, акт залын, еңбекке баулу және робототехника кабинеттерін аралап, балалардың ойын және даму бөлмелерінің жабдықталуын тексерді. Қазіргі уақытта құжаттарды рәсімдеу жұмыстары жүргізілуде.

Кейін комиссия мүшелері Волчанка ауылына барып, ауылдық округ әкімі Ботакөз Сикпаевамен бірге ауылдық дәрігерлік амбулаторияның құрылыс жұмыстарының барысын қарады. Ғимараттың қабырғалары толық тұрғызылып, шатыр орнату жұмыстары жүріп жатыр. Қазіргі таңда құрылыс алаңында 5 маман жұмыс істеуде.

Сондай-ақ жиында Шемонаиха ауданы әкімінің азаматтық қорғаныс және мобилизациялық даярлық жөніндегі басты инспекторы Сағдат Келдиев су тасқынына дайындық барысы туралы баяндама жасады. Аудандық және мемлекеттік органдарға, аумақтық бөлімшелерге Жол картасының сапалы орындалуын қамтамасыз ету, құрылыс нысандарына бақылауды күшейту, сондай-ақ мүмкін болатын су тасқыны жағдайларына толық дайын болу жөнінде ұсыныстар берілді.