Өскеменде 12 жастағы бала Самал саябағына өзі бармақ болып, жолда адасып кеткен. Абырой болғанда, полицейлер баланы дер кезінде тауып, ата-анасына аман-есен жеткізді, деп хабарлайды Altainews.kz тілшісі.

Шығыс Қазақстан облыстық полиция департаментінің мәліметінше, бала шомылуға барамын деп, саябаққа жалғыз кеткен. Алдымен автобуспен жетпек болған, бірақ қоғамдық көлік келмеген соң, жаяу жолға шыққан. Алайда жолда бағытынан жаңылып, саябаққа жете алмай қалған.

Полицейлер баланың түр-тұлғасына қатысты деректі барлық кезекші жасаққа таратып, жедел іздестіру жұмыстарын бастайды. Екі сағаттан соң бала қаланың басқа шетінен табылып, еш жарақатсыз ата-анасына қайтарылған.

Құқық қорғау органдары ата-анамен профилактикалық әңгіме жүргізіп, баланың қауіпсіздігін бақылауда ұстау қажеттігін ескертті.