Өскемендік тәртіп сақшылары жоғалған баланы тауып, ата-анасына табыстады, деп хабарлайды Altainews.kz тілшісі.

ШҚО Полиция департаментінің ақпараты бойынша, тәртіп сақшыларына хабарлама 6 сәуір күні кешкі уақытта келіп түскен. Жергілікті тұрғын кәмелет жасқа толмаған ұлы үйден велосипед тебуге шығып, оралмағанын айтқан. Өз бетімен іздеу шаралары нәтиже бермеген.

80-нен астам полиция қызметкерлері баланың белгілерін алғаннан кейін жасөспірім баруы мүмкін деген жерлерді іздеп,  достары мен таныстарынан сұрастырып, алаңдар, скверлер мен саябақтарды тексеріп шыққан.

Ертіс полиция бөлімі қызметкерлері қабылдаған шаралардың нәтижесінде таңға жуық жасөспірімнің орналасқан жерін анықтады. Белгілі болғандай, бала велосипедпен үйден алыс кетіп, кері жол таба алмай, көшеде түнеуге мәжбүр болған.