Бүгін Қазақстан халқына арнаған Жолдауында Мемлекет басшысы Қасым-Жомарт Тоқаев туризм саласына тоқталып, оның еліміз үшін стратегиялық бағыттардың бірі екенін атап өтті. Президенттің айтуынша, бұл салада түйткілді мәселелер жеткілікті, ең бастысы – кәсіби кадрлардың тапшылығы мен инфрақұрылымның жеткіліксіздігі, деп хабарлайды Altainews.kz тілшісі.

Мемлекет басшысының осы тапсырмаларын жүзеге асыру мақсатында Самар ауданы да белсенді шаралар қабылдауда. Аудан әкімі Серік Жеңісовтің айтуынша, өңір экономикасын әртараптандыру үшін туризм негізгі басымдықтардың біріне айналған.

Самар жағалауының әсем табиғаты мен жағажай туризмі болашақта халықаралық деңгейде брендке айналуы керек. Әкімнің айтуынша, аудандағы әрбір кәсіпкер туризмді дамытуға үлес қосуға мүмкіндік алады, оларға ақпараттық және ұйымдастырушылық қолдау көрсетіледі.

Осы бастамалар Самар ауданының туризмін жаңа белеске көтеріп, жергілікті экономиканың дамуына серпін бермек. Табиғи әлеуетті тиімді пайдалану арқылы аудан тек өңірлік қана емес, республикалық деңгейде де тартымды туристік орталыққа айналуы мүмкін.

Фото: Самар ауданы әкімдігінен