Алтай ауданының Прибрежный ауылында өткен жастардың ең көптен күткен әрі маңызы зор сайыстарының бірі «Жігіт сұлтаны – 2025» байқауына рухы да, тәні де мықты, өнерлі, зерек әрі еңбекқор жігіттер жиналды, деп хабарлайды Altainews.kz тілшісі.

Бұл сайыс тек ептілік пен күштің жарысы ғана емес,  ерлік пен ар-намыстың, ұлттық рух пен салт-дәстүрге деген құрметтің символына айналды. Қазіргі заманғы жігіт тек қорғаушы ғана емес, рухани дүниесі бай, халқының тарихына терең құрметпен қарайтын азамат болуға тиіс екенін байқау тағы бір дәлелдеді.

Сайыс бірнеше кезеңнен тұрды: зияткерлік викториналар, ұлттық спорт түрлері, шығармашылық қойылымдар және қолөнер шеберліктерін көрсету. Әр кезеңде қатысушылар өздерінің жан-жақты қырларын ашып, отбасына да, қоғамға да сүйеніш болуға дайын екенін көрсетті.
Жеңімпаздар есімі де белгілі болды. 1 орынды Әділжан Қадылбеков (сыйақы – 100 мың теңге), 2 орынды Елдос Бұланбек (50 мың теңге), 3 орынды Дәурен Мамырханов (30 мың теңге) иеленді.

Шара барысында Алтай ауданы әкімінің орынбасары Жанна Асқарова құттықтау сөз сөйлеп, мұндай іс-шаралардың жастарды тәрбиелеудегі және ұлттық құндылықтарды дәріптеудегі рөліне тоқталды.

Бірінші орынды иеленген Әділжан Қадылбеков өз әсерімен бөлісті.

«Жігіт сұлтаны – 2025» байқауы жарқын көрініс қана емес, өзін-өзі жүзеге асыруға, тұлғалық өсу мен рухани серпіліске жол ашатын алаңға айналды. Бұл сайыс ұлттық бірегейлікті нығайтып, патриоттық сезімді оятып, жастардың мәдени мұрамызға деген қызығушылығын арттырды.