Қазақстандағы полиция бекеттерінің саны азаяды. Мұны Ішкі істер министрі Ерлан Тұрғымбаев айтты, деп хабарлайды Алтайньюс тілшісі.

– 1 шілдеден бастап қала ішіндегі де, сыртындағы да бекеттер саны азаяды. Жол бойын фото және бейнебақылаулар арқылы бақылауды күшейтеміз, – деді Е.Тұрғымбаев.

Министр осы орайда 2000 жылы болған оқиғаны еске салды. Сол кезде құқық қорғаушылардың Өзбекстаннан Алматыға қарбыз алып өткен бір адамнан 36 рет пара алғаны анықталған екен.

– Осы саладағы артық 300 қызметкер жұмыс күші жетіспей жатқан басқа қызметтерге ауыстырылады. Ал бекеттер болса жолаушылар үшін тұра береді. Мәселен, қыста оның ішіне кіріп жылынып алуға болады, – деді министрдің орынбасары Алексей Калайчиди.

Оның айтуынша, республика аймағында заңсыз әрекеттерді бақылауға құқық қорғаушылардың күші толықтай жетеді.