Кеше, яғни 31 наурызда Өскемен қалалық, Зайсан және Ұлан аудандық мәслихаттарының шығып қалған депутаттарының орнына сайлау өтті.
Дауыс беру Өскемендегі №12, Зайсан ауданындағы №5 және №8, сонымен қатар Ұлан ауданындағы №3 аумақтық сайлау округтері бойынша өткізілді, деп хабарлайды  Altainews.kz тілшісі. 
Дауыс беру таңертеңгі сағат 7.00-де басталды. Шығып қалған депутаттардың орнына Өскеменде үш, Зайсан ауданында жеті, Ұлан ауданында үш үміткер сайлауға түсті. Өскеменде тізімдегі 9914 сайлаушының 6973-і, Зайсан ауданында тізімдегі 3959 сайлаушының 2069-ы, Ұлан ауданында 1661 сайлаушының 1166-сы дауыс берді.
Дауыс беру барысында заңбұзушылықтар болған жоқ. Бәрі заңға сәйкес, қалыпты жағдайда өтті. Учаскелерде барлық үміткердің де сенімді өкілдері отырды. Қоғамдық ұйымдар тарапынан бақылаушылар болды. Сайлау барысы бастан-аяқ заңмен белгіленген тәртіпте өтті. Дауыс беру сағат 7.00-де басталып, кешкі 20.00-ге дейін жалғасты.
Дауыс беру қорытындысына сәйкес №12 бірмандаттық аумақтық сайлау округі бойынша депутат болып 1974 жылы туған «Өскемен титан-магний комбинаты» АҚ комплаенс басқармасының басшысы Арман Айтмұханұлы Құрманғалиев сайланды.
№5 және №8 бірмандаттық аумақтық сайлау округтері бойынша Зайсан аудандық мәслихатының депутаттары болып тиісінше 1991 жылы туған жеке кәсіпкер Кенжебек Кеңесханұлы Оспанов және 1985 жылы туған Амангелді атындағы негізгі орта мектептің директоры Асқар Ахатұлы Ахметқалиев сайланды.
Ал №3 бірмандаттық аумақтық сайлау округі бойынша Ұлан аудандық мәслихатының депутаты болып 1985 жылы туған «Асубұлақ орман шаруашылығы» коммуналдық мемлекеттік мекемесінің директоры Дамир Жеңісханұлы Тоқанов сайланды.