Бұған дейін жазғанымыздай, Өскеменнің «Торпедо» хоккей клубы өз тарихында тұңғыш рет 2026 жылғы IIHF Құрлықтық кубогінде күміс жүлдеге қол жеткізді. Жерлес команда 2025-2026 жылғы маусымның финалдық кезеңін Англияның Ноттингем қаласында өткізіп, халықаралық аренада жоғары деңгейде өнер көрсетті. Ал бір сағат бұрын өскемендік хоккейшілер облыс орталығына ұшып келді. Оларды Өскемен әуежайында жанкүйерлері салтанатпен қарсы алды, деп хабарлайды Altainews.kz тілшісі.

Еске салсақ, аталған турнирдің шешуші ойындарында өскемендік хоккейшілер шеберлік пен жігердің нағыз үлгісін танытты. «Торпедо» Данияның «Хернинг Блю Фокс» командасын 6:2 есебімен айқын басымдықпен жеңсе, Францияның «Дюк д’Анже» клубымен болған тартысты кездесуде овертаймда ғана 2:3 есебімен есе жіберді. Алайда, бұл жағдай ақтық сәтте өнер көрсетуге еш кедергі бола алған жоқ.

Ал алтын жүлде үшін өткен финалда қазақстандық клуб жарыс қожайындары – Ұлыбританияның «Ноттингем Пантерз» командасымен мұз айдынында жолықты. Тартысқа толы ойын 4:2 есебімен британдық ұжымның пайдасына аяқталды. Осылайша, «Торпедо» турнир қорытындысы бойынша Құрлықтық кубоктың күміс жүлдесін иеленді.

Бас бапкердің айтуынша, команданың алдында енді осы жылда Қазақстан чемпионатында топ жару және келесі жылы Құрлықтық додаға қайта қатысып, осы жолы кеткен есені қайтарып, алтын кубокты жеңіп алу мақсаты тұр.     
Айта кетейік, бұл нәтиже – клуб тарихындағы Құрлықтық кубоктағы ең жоғары жетістік. Бұған дейін өскемендік команда 2007-2008 жылғы маусымда қола жүлдеге қол жеткізген еді.

Құрлықтық кубоктағы күміс медаль тек «Торпедо» клубы үшін ғана емес, жалпы қазақстандық хоккей үшін де зор маңызға ие. Бұл жетістік отандық клубтардың халықаралық деңгейдегі бәсекеге қабілетті екенін айқындайтын нақты көрсеткіш.

Қоса кетсек, «Торпедо» командасының қақпашысы Владислав Пестов осы Континенталдық кубокта финалдық сериядағы голкиперлер рейтингінде көш бастап, «Үздік ойыншы» деп танылды. Ол барлық үш матчқа да қатысып, өз қақпасына бағытталған соққылардың 93,4 пайызын кері қайтарып, ерекше көзге түсті.

Өз кезегінде ойыншылар қала тұрғындарына қолдау көрсеткені үшін алғыс айтып, бұл нәтиже Pro Hokei Ligasy Қазақстан чемпионатының плей-офф кезеңіне дайындықтың маңызды сатысы екенін атап өтті. Команда бірден тұрақты чемпионат ойындарына дайындықты бастайды. «Торпедо» келесі ойындарын үйде, 21-22 қаңтар күндері петропавлдық «Құлагерге» қарсы өткізеді.

Видео: Евгений Щетников
Фото: Артём Жигулин