Колонияға газдалған сусынның бөтелкесіне алкоголь құйып өткізбек болған өскемендік тұрғын қолға түсті.

Оқиға №22 мекеменің бақылау-өткізу пункттерінің бірінде болды, деп хабарлайды Altaynews тілшісі.

Ер адам колонияға өзінің досымен кездесу үшін келіп, «сәлемдеме» әкелген көрінеді. Оны тексеру барысында қоңыр және мөлдір түсті төрт пластикалық бөтелке мен тәттілер шыққан. Алкогольдің иісі шыққандықтан бөтелкелер тәркіленіп, сараптамаға жіберілді.

Айта кету керек, бұл жағдай – тыйым салынған заттарды мекеме аумағына әкелуге тырысқан алғашқы факт емес.

Мәселен, №17 мекемеге 33 жастағы тұрғын сәбиімен және анасын ертіп жұбайымен кездесуге келген. Олар әкелген жеке заттар мен азық-түліктерді тексеру барысында жол сөмкесінің ішкі қалтасынан SIM картасы бар смартфон табылды. Әйелдің айтуынша, ол заттардың арасында телефон бар екенін ұмытып кеткен. Осы факт бойынша тыйым салынған заттарды режимдік аумаққа кіргізбек болғаны үшін Әкімшілік құқық бұзушылық туралы хаттама жасалып, іс сотқа жіберілді.