Семейде 90 жастағы зейнеткер қала әкімінен көмек сұрады, деп хабарлайды Altaynews тілшісі.

Чехов көшесі, 90 мекенжайында тұратын кейуана әбден тоңдым дейді. Зейнеткер, жыл сайын «Қысқа 100% дайынбыз» деп жарты әлемге жар салатын «Жылукоммунэнерго» мекемесінің мамандарына өкпелі. Бұл туралы ол «semey_zhaloby2» паблигында айтқан.

-        Құрметті әкім! Тоңып отырмыз. Былтыр да қысты тоңып өткізгенбіз, биыл да дәл солай. Қашан жылу береді? Қайда баруымыз керек? Кімге айтуымыз керек? Жасым болса тоқсанда, - дейді кейуана.

-        Былтыр мәселе шешіледі деген, алайда нәтиже жоқ. Үйдің іші суық, ал біз жоқ жылуға ақша төлеп отырмыз. Көмектесулеріңізді сұраймыз, - дейді тұрғын Динара Уалиханова.

Естеріңізде болса, «Жылукоммунэнерго» мекемесі директорының орынбасары  Николай Демин, жазда қазандықтардың көпшілігі жөндеу жұмыстарынан өтті. Сондықтан қыста ешқандай мәселе туындамайды, – деген болатын. Алайда шаһар тұрғындарының айтуынша баяғы жартас сол жартас.

-        Бізге дәл сол мекенжайдан ешқандай шағым түскен жоқ. Сондықтан тұрғындар бұл мәселені алдымен келісімшарт бекіткен ПИК (КСК) басшылығына айтуы қажет, - дейді Жылукоммунэнерго мекемесі мамандары.

Айта кететін тағы бір жайт, жылыту маусымына биыл қала бюджетінен 295 миллион теңге, ал «Жылукоммунэнерго» 150 миллион теңге бөлген. Сондағы бөлінген қаражат – 445 миллион теңге.