Аймақ басшысы  Даниал Ахметов Өскемендегі салынып жатқан және жаңадан жабдықталып жатқан әлеуметтік нысандарды аралады. 19-ықшамауданда (Қан орталығының маңында) мемлекеттік-жекеменшік серіктестік аясында салынып жатқан балабақшаның жұмыс қарқыны жақсы екенін атап өтті. Ол жаңа жылда пайдалануға беріледі. Облыстық көпсалалы онкология және хирургиялық орталықтың да жабдықталуы көңіл қуантарлық екенін тілге тиек қылды, деп хабарлайды Алтайньюс тілшісі.

Сондай-ақ көпсалалы технологиялық колледжге де ат басын бұрды. Жалпы облыста мұндай кәсіптік колледждердің саны оннан асады. Солардың ішінде осы Өскемендегі оқу орынының жанынан компетенция орталығы ашылған.

– Біз мұны KAZ Minerals AKTOGAY компаниясымен бірлесіп аштық. Компания орталыққа 300 миллион теңге қаржы құйғанын атап өтейін. Әлі де осы орталықтың жұмысын жетілдіруге көптеген іс істейміз. Алдағы уақытта басқа колледждердің студенттері осы жерге келіп іс-тәжірибеден өтіп тұрады, – деген аймақ басшысы Даниал Ахметов қазіргі уақытта кәсіптік мамандықтар сұранысқа ие екенін баса айтып кетті. Колледж басшысының сөзінше, осы оқу орынында жұмысшы мамандықтардың барлығы оқытылады.

Облыс әкімі колледж студенттеріне жатақхана да салу керегін айтты. Білім басқармасының басшысы Сайрангүл Сауытбайдың сөзінше, жатақхананы КШТ ауданынан салу жоспарланған екен. Дегенмен де, аймақ басшысы осы оқу орынына жақын маңнан жер қарастыру керегін тапсырды.

Айта кетейік, колледж Абай даңғылы мен Лермонтов көшесінің қиылысында орналасқан.