Салауатты өмір салтын ұстанғысы келді ме екен, әлде мақсаты болды ма? Әйтеуір ұрлықпен ұсталған ШҚО тұрғынын полицейлер тергеп жатыр, деп хабарлайды Алтайньюс тілшісі.

Бұған дейін 125 рет жауапкершілікке тартылған 44 жастағы жұмыссыз азамат ірі сауда үйлерінің бірінде орналасқан дәріханадан скандинавиялық жүріске арналған таяқтарды ұрлап кеткен.

Оқиға орнына дереу жеткен тәртіп сақшылары бейнежазба арқылы күдіктіні қолға түсірді.

Осылайша бұған дейін 125 мәрте жауапкершілікке тартылып, бас бостандығын шектеу жазасына кесіліп, есепте тұрған Приречный ауылы (Семей қ.)  тұрғынының «спорттық мансабы» басталмай жатып аяқталды.

Қазіргі уақытта күдіктіге қатысты сотқа дейінгі тергеу жүріп жатыр.