Өскемендегі мектептердің бірінде кафе ашылады
Өскемендегі мектептердің бірінде оқушыларға арналған кафе ашылады, деп хабарлайды Алтайньюс тілшісі.
– Бұрын мектеп асханасын жалға алушылар бір жылдық келісімге ғана отыратындықтан асхана ішін жөндемейтін еді. Бірақ бұдан былай олар жөндеуге, құрал-жабдықтармен жабдықтауға міндеттеледі. Есесіне жеті жылдық келісімшарт жасасамыз, – деген еді қала әкімі Жақсылық Омар.
Қаладағы №37 орта мектептің асханасын жалға алушылар іске кірісіп кеткен екен.
– Асхана дизайнын өзгертіп, оқушылар кафесі етіп жасақтамақпыз. Қабырғалардың бірі түгелдей түрлі-түсті айна болады, екіншісі кірпішпен өріледі. Бұрынғы үстелдердің орынына дөңгелек үстел қоямыз. Оған бір топ бала айналып отыра алады. Теледидар да орнатамыз, – деді кәсіпкер Яна Родякина.
Айтуынша, келесі жылы мұнда карта арқылы төлеу жүйесі енгізіледі. Сонда ата-аналары баласының қалай тамақтанып жүргенін, қанша ақша жұмсағанын біле алады.
Асхана 15 тамызда толық дайын болады екен.
– Жыл соңына дейін бүкіл 50 мектепті жөндеу керек деп жоспарлағанбыз. Соның 35-і қыркүйекке дейін дайын болады. Ал қалған 15-ін ата-аналармен келісіп, демалыс кездерінде жөндетеміз, – деді Жақсылық Омар.