Облыс орталығында жылыту маусымы әзірге аяқталған жоқ. Десе де, Өскемен ЖЭО энергетиктері алдағы күзгі-қысқы кезеңге жабдықтарды дайындауға белсенді кірісіп кеткен. 
Бүгінгі таңда станцияда тоғыз қазандық агрегаты және сегіз турбиналық агрегат орнатылған, деп хабарлайды Altaynews тілшісі. 
 «Өскемен ЖЭО» ЖШС өңірдегі ең ірі жылу электр орталығы болып табылады. ЖЭО қызметкерлері 2023 жылға арналған жөндеу науқанының бұрын бекітілген кестесіне сәйкес жөндеуге кірісті. 
 Өскемен ЖЭО-да жыл сайын негізгі жабдықта жұмыс істеу шамасына қарай, парктік ресурсы аяқталған бөлшектерді жоспарлы ауыстыру жүргізіледі. Қызметтің нормативтік мерзіміне жеткен кезде жабдықтың техникалық жай-күйін айқындау үшін мамандандырылған сараптама ұйымы өнеркәсіптік қауіпсіздікке сараптама жүргізеді. Сараптама нәтижесі оң болған жағдайда жабдықты парктік ресурсынан тыс (қызмет ету мерзімін ұзарту) одан әрі пайдалануға рұқсат етіледі.

  Бүгінгі таңда Өскемен ЖЭО өзінің қаржылық мүмкіндіктерінің шегінде жұмыс істеп келеді. Ағымдағы тариф көмірдің, судың, қосалқы бөлшектердің, жөндеу жұмыстарына қажетті материалдардың жылына бірнеше рет өсіп келе жатқан құнын қамтымайды. Қолда бар қаражат міндетті түрде жүргізілуі тиіс ең қажетті жөндеулерге ғана бөлінеді.