Шығыс Қазақстан – ел экономикасының индустриялық тіректерінің бірі. Өңірдің өндірістік әлеуеті, зауыттар мен энергетикалық нысандардың шоғырлануы ең алдымен Өскемен қаласына елеулі экологиялық салмақ түсіретіні жасырын емес. Сондықтан өңір үшін экология мәселесі тек салааралық тақырып емес, тұрғындардың өмір сапасына тікелей әсер ететін стратегиялық басымдыққа айналып отыр, деп хабарлайды Altainews.kz тілшісі. 

Экологиялық тәуекелдерді азайту бағытында Өскеменде ауа сапасын бақылаудың кешенді жүйесі қалыптастырылды. Қала аумағында 25 бақылау бекеті орнатылып, атмосфералық ауаның жағдайы тәулік бойы қадағаланады. Бұған қоса, заманауи, жоғары дәлдіктегі жабдықтармен қамтылған мобильді экологиялық зертхана іске қосылды.

Экологиялық жағдайды жақсарту тек бақылау мен шектеулермен шектелмейді. Өңірде экологиялық ағарту жұмыстарына, тұрғындарды табиғатты қорғау ісіне кеңінен тартуға ерекше мән берілуде. «Таза Қазақстан» акциясы мен жаппай эко-сенбіліктер қоғамда қоршаған ортаға деген жауапкершілікті күшейтіп, әрбір азаматтың табиғат алдындағы парызын сезінуіне ықпал етуде.

Осылайша, Шығыс Қазақстанда экология мәселесі кешенді түрде, бақылау, серіктестік және қоғамдық қатысу қағидаттарына сүйене отырып шешілуде. Өскеменнің өнеркәсіптік қуатын сақтай отырып, қала ауасын тазартуға, тұрғындардың денсаулығы мен болашақ ұрпақтың өмір сапасын қорғауға бағытталған нақты шаралар тұрақты жүзеге асырылуда.

Артем Жигулин 

Махаббат Ахметжанова